Tolosaldeko Hitza

Igande honetan, Basurde elkarteak antolatuta, Berastegiko Basoetatik 14. Ibilaldi Neurtua egingo dute. 07:00etan irtengo dira parte-hartzaileak Berastegiko plazatik eta 30 kilometroko bidea egin ondoren 8 ordu ingururen bueltan iritsiko dira berriro ere Berastegira.

Ibilbidean zehar mendizaleek kontroletatik igaro beharko dute eta igarotako denbora zehaztutako epearen baitakoa izan beharko du. Halaber, gutxienez 6 ordu eta erdi eta gehienez 8 ordukoa izan beharko du ibilaldi osoa egiten igarotako denborak. Ondorengo puntuak igaroko ditu ibilaldi neurtuak: Erroizpe (Larte), Boketea, Ulizar, Urto, Plazaola, Ipuliño, Gorosmendi eta San Lorentzo. Azken puntu horretatik, hau da, San Lorentzotik Berastegirantz jarraituko du bideak bertako plazan amaitzeko. Ibilaldiko unerik gogorrena eta garaiena Ipuliñoko punta izango da, baina kontuan hartu beharko dira baita ere Larte, Ulizar eta San Lorentzo ere. Bestalde, jatekoa eta edatekoa ez da faltako, hiru gune jarriko baitituzte horretarako, eta edozein larrialdi gertatuz gero ere, bertan izango da Gurutze Gorria ibilaldiak iraun bitartean.
Ibilbide Neurtua amaitzen duten guztiei diploma bat emango zaie norberaren izenarekin, eta guztien artean mendiko materiala zozketatuko da.
Berastegiko 14. Ibilaldi Neurtuan parte hartu nahi duenak izena emateko 943 68 35 35 zenbakira deitu beharko du, edo bestela igandean bertan egin ahalko du hasi aurretik 6:00etatik aurrera. 5 euro ordaindu beharko dute parte-hartzaileek.

zenbait datu
izen-ematea: 943 68 35 35 zenbakian.
Ibilaldiko egun berean, 06:00etatik aurrera.
45 euro ordainduko dira.

ibilaldia
Luzera: 30 kilometro.
Desnibela: 1.350 metro.
Ibilbidea: Berastegi, Erroizpe (Larte), Boketea, Ulizar, Urto, Plazaola, Ipuliño, Gorosmendi, San Lorentzo eta Berastegi.
Denbora: 6 ordu eta erdi gutxienez eta 8 ordu gehienez.
Anoa guneak. Ulizar, Urto, Gorosmendi eta Berastegin, jan eta edateko aukera.